დავით ჩიხელიძე: საქართველო-ყირგიზეთის შეთანხმება მხოლოდ ორმხრივი ურთიერთობების განვითარებას არ ემსახურება

პრემიერის ვიზიტი ყირგიზეთში „საერთო გაზეთთან“ პოლიტოლოგმა დავით ჩიხელიძემ შეაფასა.

- ბატონო დავით, საქართველო და ყირგიზეთი სავაჭრო-ეკონომიკური თანამშრომლობის გაღრმავებაზე შეთანხმდნენ. რამდენად მნიშვნელოვანია კობახიძის ეს ვიზიტი? 
- ირაკლი კობახიძის ვიზიტი ყირგიზეთში მნიშვნელოვან პოლიტიკურ და ეკონომიკურ დატვირთვას ატარებს, განსაკუთრებით იმ პირობებში, როდესაც მსოფლიო ეკონომიკური და პოლიტიკური ცენტრები სულ უფრო მეტ ყურადღებას უთმობენ ევრაზიულ სივრცესა და სატრანსპორტო დერეფნების განვითარებას. ვიზიტის მნიშვნელობას ზრდის ის ფაქტიც, რომ ეს ორ ქვეყანას შორის უმაღლეს დონეზე განხორციელებული პირველი ოფიციალური ვიზიტია, რაც ურთიერთობების ახალ ეტაპზე გადასვლას ნიშნავს. 
გლობალურ კონტექსტში, ცენტრალური აზია საერთაშორისო პოლიტიკის ერთ-ერთ მნიშვნელოვან რეგიონად ჩამოყალიბდა. რეგიონით დაინტერესებული არიან როგორც ჩინეთი, ასევე ევროკავშირი, თურქეთი და სხვა მსხვილი ეკონომიკური მოთამაშეები. ასეთ პირობებში საქართველოსთვის განსაკუთრებული მნიშვნელობა აქვს ცენტრალური აზიის ქვეყნებთან მჭიდრო ურთიერთობების განვითარებას, რადგან ჩვენი ქვეყანა ევროპასა და აზიას შორის დამაკავშირებელი რგოლია. ყირგიზეთთან თანამშრომლობის გაძლიერება სწორედ ამ სტრატეგიის ნაწილია. 
ლოკალურ დონეზე ვიზიტი მნიშვნელოვანია იმითაც, რომ საქართველო ცდილობს, გააფართოვოს პარტნიორთა წრე და ახალი ეკონომიკური შესაძლებლობები შექმნას. ორი ქვეყნის ლიდერების მიერ მიღწეული შეთანხმებები და ხელმოწერილი დოკუმენტები ქმნის იმის საფუძველს, რომ ურთიერთობები პოლიტიკური დიალოგის ფორმატს გასცდეს და პრაქტიკულ ეკონომიკურ შედეგებშიც აისახოს. შესაბამისად, ვიზიტი შეიძლება შეფასდეს როგორც მნიშვნელოვანი ნაბიჯი საქართველოს რეგიონული როლის გაძლიერებისა და ცენტრალურ აზიასთან თანამშრომლობის ახალი შესაძლებლობების შექმნის მიმართულებით.
- რა გავლენას მოახდენს საქართველოზე პოლიტიკური და ეკონომიკური თვალსაზრისით ეს შეთანხმება? 
- პოლიტიკური თვალსაზრისით, შეთანხმება ხელს შეუწყობს საქართველოს პოზიციების განმტკიცებას ცენტრალურ აზიაში და კიდევ უფრო გააძლიერებს ქვეყნის როლს რეგიონულ თანამშრომლობაში. 
განსაკუთრებით მნიშვნელოვანია ის გარემოება, რომ თანამედროვე საერთაშორისო გარემო მრავალპოლუსიანობისკენ ვითარდება და სახელმწიფოები ცდილობენ, პარტნიორული ურთიერთობები სხვადასხვა რეგიონთან განავითარონ. ასეთ პირობებში საქართველოსთვის სასარგებლოა მეგობრული და სტაბილური ურთიერთობების ჩამოყალიბება ცენტრალური აზიის ქვეყნებთან, მათ შორის, ყირგიზეთთან. ამასთან, ყირგიზეთის მხრიდან საქართველოს სუვერენიტეტისა და ტერიტორიული მთლიანობის მხარდაჭერა ქვეყნისთვის დამატებითი პოლიტიკური კაპიტალია საერთაშორისო ორგანიზაციებში. 
ეკონომიკური თვალსაზრისით, შეთანხმების პოტენციალი განსაკუთრებით დიდია. ბოლო წლებში მნიშვნელოვნად გაიზარდა ე. წ. შუა დერეფნის როლი, რომელიც აზიასა და ევროპას ერთმანეთთან აკავშირებს. საქართველოს გეოგრაფიული მდებარეობა საშუალებას აძლევს ჩვენს ქვეყანას, ამ მარშრუტის ერთ-ერთი მთავარი მონაწილე იყოს. 
ყირგიზეთთან ეკონომიკური კავშირების გაღრმავება, ასევე, ჩინეთ-ყირგიზეთ-უზბეკეთის სარკინიგზო პროექტის განვითარება, ზრდის შანსს, რომ საქართველოს სატრანზიტო ფუნქცია კიდევ უფრო გაძლიერდეს, რაც დამატებით ტვირთბრუნვას, შემოსავლებსა და ინვესტიციებს მოიტანს. 
გარდა ამისა, თანამშრომლობის გაფართოება ხელს შეუწყობს სავაჭრო ბრუნვის ზრდას, ბიზნესკავშირების გაღრმავებასა და ახალი ბაზრების ათვისებას. მნიშვნელოვანია ტურიზმის მიმართულებაც, რადგან პირდაპირი ავიამიმოსვლის ამოქმედების შემთხვევაში, გაიზრდება როგორც ტურისტული ნაკადები, ისე ადამიანებს შორის კონტაქტები, რაც, საბოლოოდ, ეკონომიკურ აქტივობაზე დადებითად აისახება. 
საერთო ჯამში, საქართველო-ყირგიზეთის შეთანხმება მხოლოდ ორმხრივი ურთიერთობების განვითარებას არ ემსახურება. ის საქართველოს უფრო ფართო სტრატეგიის ნაწილია, რომლის მიზანია ჩვენი ქვეყნის როლის გაძლიერება ევროპასა და აზიას შორის დამაკავშირებელ ეკონომიკურ და სატრანსპორტო ცენტრად, რაც როგორც პოლიტიკური, ისე ეკონომიკური თვალსაზრისით, ჩვენს გრძელვადიან ინტერესებს პასუხობს.

ნაზი ბერიძე